SISIFU

Cantigu soziale in terza rima


CANTIGU I

 Populu sardu, legge, pensa e impara
A distingher su bonu due su malu
Sifaghes ai custu bona cara
T'happ'a fagher calch'atteru regalu.
 

Cando mamma mi attesit a su mundu,
Finas sas duras pedras han piantu...
Ca naschesi quadru o pagu tundu.

Si si dat ogni femina su antu
Ch'appat in terra fatt'unu meraculu,
Nisciuna mama hat fattu atterettantu.

Briva 'e lughe in segret'ispettaculu,
Cun pant'asimas solu in cumpagnia
M'hat fattu zegu, toppu e senza baculu;

Solu cun sas arijas intendia
S'invisibile zente arrejonende
Supr'a su fattu de sa ennida mia.

Inter'issas fin duas disputende,
Ca una mi deviat battijare,
E ambas fin su lumene chirchende.

A ultimu passesini a votare...
E dogn'una sa sua opinione
Intr'e un'urna deviat lampare.

S'urna fit unu 'ezzu pantalone,
Male cosidu e peus tappuladu
Chi no serviat mancu a pellizzone.

In issu una busciacca han agatadu
Fatt'a zisa 'e rezza 'e piscadore:
Simbulu de su nascher fortunadu

Sas chi fin de su numeru mazore,
Discepulas de s'orrida fortuna,
Happesin de sa dea su favore.

Cun boghe iscandelosa intresit una
A cantare sas laudes a su male
Ch'idet sutt'a su sole e a sa luna.

Issa tenet s'imperiu generale:
In tempos noso e in tempos passados,
Est sa gloria sua universale.

Fida cumpagna 'e sos irrediados,
Continu s'alimentat cun su risu
De sos chi sunu in altu collocados,
Ca pro custos sa Terra est Paradisu.

 

CANTIGU II

Custa padrona 'e s'homine mortale,
Nada in s'antigu seculu innozente,
Segundu sa credenzia prinzipale;

Fit parturida dae unu serpente
E posta pro eterna inimicizia
Tra sa virtude, mastra eloquente,

E i sa sempre barbara malizia,
Issa tenet su mundu incadenadu
Affoghende s'unore e i sa giustizia.

O musas, ch'hazis s'homine onoradu
De sa pius isplendida corona,
Cand'a pes bostros s'est umiliadu

In Pindu, in Parnasu, in Elicona,
Forza mi cunzedide e happ'a mustrare
De su mundu cust'ampia padrona.

Nerzesi ducas in su cominzare,
Chi dogn'una sa sua opinione
Intr'e un'urna deviat bettare;

Però forzesin sa suspensione
Sas importunas laudes cantadas
Fattend'unore a sa corruzione.

Tra sas chi fin a mie inghiriadas
Una pius de tottu autorevole,
Distinta fra sas mezus elevadas

A su gradu pius cunsiderevole,
Scientificamente hat dimustradu
S'istadu meu cumpassionevole.

Appenas ch'in ballanza hana pesadu
Si fit utile ponner tottu in pratica
Cant'haiat sa mastra ispiegadu,

Un'atter'una, cun solenne tattica,
Si raccumandat in custa manera:
O fiza a s'altu geniu, simpatica,

Chi nisciuna est de te pius sinzera,
Mama de ogn'onesta conquista,
Inimiga 'e s'empirica chimera;

Pro chi non siat s'esistenzia trista
De custu colzu bimbu abbandunadu,
Tu'has poderes donali sa vista.

Pro chi vivat in parte reparadu
Dae sa lughe 'e zertos candeleris
Chi tanta vera lughe han oscuradu.

Ca si tue sos ojos no l'aberis,
S'hat a fagher pianta e no fiorit
E l'atterran sos bentos pius lezeris.

O, si goi lu lassas, s'addolorit...
Essende brivu 'e maternu cunfortu,
In su Iudu ch'est naschidu si morit.
Pro vivere infelize mezus mortu!

 

CANTIGU III

Unu lampu s'istanzia oscurosa,
De improvvisu hat totta illuminadu
Ponzend'in lughe ogni segretta cosa;

Et est in ojos mios prenettadu
Allontanende cuddu oscuru velu
Chi b'haiat sa naschida lassadu.

Primma 'e tottu osservesi su chelu,
Ca da issu fit bennida sa lughe;
E ammiresi su divinu zelu.

E bidesi pioere una rughe
E intendesi sas boghes perfettas:
Cust'est sa tua ... e tue ti la jughe.

Cuntemplesi sos bellos pianetas,
Su numeru infinitu 'e sas istellas,
E immesu su bell'astru 'e sos poetas.

A tanta maraviglia e cosas bellas,
Mandesit s'innozenzia su suspiru
Confusu in sas insoro parentellas.

ln custu primmu liberu respiru,
Desi a sas primas lagrimas isfogu;
Poi abbascesi sos ojos in giru.

Distintas cosas in s'arcanu logu
Mi fit cunzessu 'e ider e cumprendere
Cantu siat su maschere unu jogu:

Chi nisciunu hat derettu'e pretendere
Chi de su chi possedit est padronu,
Giaghì su ch'hat rezzidu devet rendere.

Sos esseres attivos faghen donu
De sa vida, essendebi obligados.
Resessat campione malu o bonu;

E i sos casos differenziados
Produin parte bene, parte affannos,
Parte tristos e parte fortunados,

Derettos puru, minores e mannos,
Obbligos e doveres pro dognunu...
E Morte est sa chi limitat sos annos.

Tue chi legges no sias dejunu
Nè ti siat cumpagna s'innoranzia,
Et eo t'happ'a essere opportunu.

Ajò, intra cun megus in s'istanzia,
Faghe coraggium e si tu' arrejonas
Faghimus un'iscutta 'e cunfidenzia.

E no happas paura 'e sas padronas,
Già sunu tottu fizas de una mama,
E immesu sas malas bi ndat bonas.
Tu' osserva e istudia sa trama.

 

CANTIGU IV

S'urna misteriosa est già piena.
Ch'hat regoltu augurios e votos
Pius ch'in fundu a mare no hat rena.

Sos lumenes antigos pius connotos,
Freguran giaramente in dogn'ischeda:
De starte fizos e a starte devotos.

A los ponner in riga, essende meda,
Est affrontare un'opera pesante;
E a su pesu est bisonzu chi zeda.
 
Ma si tue chi legges ses bastante
A ti nde fagher giara una idea,
Has a bider cant'est istravagante.

A manca una fregura trista e fea
Tenia, e a dresta unu bambinu;
E a dananti una bianca dea.

Sa fea est sa chi tenet de continu
Suggettos sos chi sunu abituados
A camminare in su falzu caminu.

Su bambinu est amigu 'e sos biados,
Ch'hat sos fizos d'Adamu aggualados;
E cun s'opera sua hat dadu a prou

Chi dogn'omine giustu, giaru e francu,
Est cun issu, l'est frade, est fizu sou.
Sa dea chi estida est de biancu,

Est sa cumpagna mia e mi consizat
A narrer su piusu e i su mancu.
Issa su coro meu lu manizat,

Bi faghet una limpida funtana
E tottu che i su meu los disizat.
Pro custu fit a mie propiana

Cando sa prima lughe happo miradu,
E mai dae me vivet lontana.
Poi ch'hat sa ischedasa osservadu,

De lagrimas formende unu fiumene,
M'hat unidas ses litteras mustradu.
Sos chi como leggides custu lumene

E chi no connoschides custu lumene
E chi no connoschides chie sia,
Faghid'appellu a s'antigu costumene:

Attraessende sa Mitologia,
Su primmu campione ch'incontrades
Vittima de s'orrenda tirania,

Coment'issu si jamat domandades
-Si no bos faghet su rigore ischifu-
E a sa prima oghe chi li dades,
Issu rispondet: Deo so SISIFU.

 

CANTIGU V

Sa notte isparit, e pianura e monte
E cantu in terra abbundat est in festa
E saludat su sole in s'orizzonte.

Giro sos ojos a manca e a dresta
E bido sola sa cumpagna mia
Cun diadema isplendidu in sa testa.

Affabile e piena de allegria,
Cun su consoladore dulze risu,
Sezzid'affac'a mie la idia.

Poi chi carignadu m'hat in visu,
Nerzesit: Frade, presta attenzione
A cant'ides passare de improvvisu
 
In custtispiju dogni paragone
Ch'has annotare chibberu passende,
De sa razza umana est campione.

Ndas a bider allegros, triunfende
Supr'a sos chi pissighit s'istraura,
Ma sa mazore parte est pianghende.

In primu logu canta cun misura
S'umana babilonia presente;
Poi sa vida de sa zente futura.

Osservo e bido in sa lastra lughente,
Una boccia immesu a duas manos,
Girende sempre e barria 'e zente:

Homines assassinos, inumanos,
Imbrogliones, birbantes, traitores,
Ispoza-mortos, barbaros, tiranos;

Mandrones, ladros, calunniadores,
Mercantes, istrozzinos, titulados,
Feminas ruttas, falzas in colores,

Ispadas e fosiles e soldados,
Corazzadas, fortinos e cannones,
Homines prepotentes gallonados.

Cudreles gherras, duras chistiones,
Ticchirrios ch'ispinghet su dolore,
Iras, frastimos, maladissiones,

Perdidas isperanzias, terrore,
Ingannu tra isposas e maridos,
Pugnales e velenos a s'umore.

Malaidos bambinos mal'estidos,
Mamas brivas de latte, istrazzuladas,
Babbos sempr'affannosos e famidos.

Giovaneddas ingenuas ingannadas,
Promittidores vagabundos, viles;
Bezzos frundidos in sas cantonadas.

Casteddos, chejas, turres, campaniles,
Preideros e padres ingrassados
Isfruttende poveros foghiles,

Altares in buttega cambiados,
Boidas funziones, falzos dios, - (deos)
Cristos bendidos, santos negusciados.

Umanu samben terramadu a rios,
Inquisidos, turturas e fogos.
Cunventos sepultura pro sos bios.

Immorales festinos, tristos giogos,
Favorimentos, partigianeria,
Un esser solu intreu in tantos logos.

Orgogliu, vanidade, ipocrisia,
Faulas, innoranzia, ambiziones
Dispressiu, dominiu, tirania,
 
Odiu, oltraggiu, superstiziones,
Zivilidade falza rutta in fundu.
Negusciantes de gloria buffones.
Ecco sa vida 'e su presente mundu!

 

CANTIGU VI

Frabbicas imponentes, zimineas,
Fumos ch'alzan in tottu sas aèras
Triunfu de sas bobiles bideas.

Cilindros, funes e vaporieras
E rodas velozzissimas girende
In differentes modos e rnaneras.

Velas biancas in su mare andende,
Meravigliosas naes a vapore
D'ogni dificultade superende.

Cant'est util'in terra e hat valore,
Cantas ricchesas coltoit su mare,
De su liberu sunt triunfadores.
 
Invanu resistenzia han a mustrare
Sas altas e durissimas montagnas
A tanta volontade in s'operare;

S'amine, prenettadu in sas intragnas,
Unit appare dogni nazione:
Tottu ziviles e tottu cumpagnas.

E no regnat pius distinzione
Tra populos e razzas: una solu
Est su battu, una sola sa rejone.

E serras e bistrales sun ìn bolu.
Sas oscuras forestas atterrende ...
Birgonza antiga e modernu consolu.

Bellos campos arados, produende
Ogni semene ruttu a s'unu chentu;
Allegros campagnolos coltivende.

Binzateris, continu in movimentu,
Coltivan cun amore sa pianta
E regoglien su nobile alimentu.

Sa terreste ricchesa, essende tanta,
No est plus dae pagos ingullida:
Ca derettu 'e tottu est tottaganta.

Mama redenzione est arrivada ...
Eccola triunfante e gloriosa,
Ch'hat sa tanta miseria distruida!

Giocunda est e felize dogn'isposa.
Ca pro nudrire sos teneros fizos
Han abbundante s'unda preziosa.

Giovanas bellas, tra rosas e lizos,
Chi lobran su chi tenen in su coro,
Senz'odiu, 'elosa nè fastizos,

Modestos matrimonios, cun decoro
Zelebrados in s'arca fiorida,
Senza sa vana pompa o su folz'oro.

E in sa sozietade redemida,
S'iden bambinos prosperos e bellos
Creschende fortes in sa noa vida.

Sanos robustos giovanos modellos,
Virtuosos, modestos, educados,
A dogni tristu viziu ribellos.

Bezzos fortes, in annos avanzados
Ch'in paghe serran sos ojos benignos
Beneighende s'ora chi sun nados,

Ca fin de sana tempera, sanghignos,
Plenos de forza fisica e morale:
Giaros eroes de sa laude dignos.

In s'eterna armonia universale
Prosperat ogn'istudiu, ogni sienzia
Pro cumbatter s'errore e i su male.

Triunfu de s'umana intelligenzia,
Poi ch'hat tantos seculos duradu
S'aspra pelea e sa nostr'esistenzia.

Ecco chi finalmente han triunfadu
Derettos e doveres e rejone:
S'isviluppu a sa meta est arrivadu.

Unica e frimma sa religione
Fundada suprta s'unicu Ideale
Chi lassat tranquilla ogni persone

Sa festa est una sola, prinzipale,
Chi l'hat già sa cuncordia fissada;
Custa die est pro tottu in generale.

Ogn'anima sublime in terra nada,
In premiu 'e sos altos sentimentos,
Est de sa vera gloria coronada.

Onestos giogos e divertimentos,
Musicas, ballos e allegros cantores
Renden deliziosos sos mamentos.

Inzenios altos e superiores
Tessen innos de gloria, pro cantare
Tottu su mundu e sos trabagliadores.

Ecco sa vida noa, ecco s'andare,
Ch'eterna devet esser cumbinada;
E mezzorende devede avanzare.

O zente ancora a nascher, reservada
A sa pius perfecta libertade,
Tue felize ses e fortunada
Ch'has a connoscher sa mezus edade.