A UNA ROSA

 

Mentres passizaia
Solitariu, unu die, in su giardinu,
E ch'in s'intentu fia
D'osservare unu bellu gelsominu,
S'attenzione mia,
Fra tantos bellos de ponner in sinu,
Si firmat curiosa
A cuntemplare una virgine rosa.

Fatto unu passu ancora
E m'avvicino rispettosamente,
E la ido segnora
E da ogni fiore indipendente
Non passesit un'ora
Chi su coro, battende fortemente
Senza mai zessare,
Mi cunvinzesit a li domandare:

Narami, bella rosa,
Tue chi de fiores ses reina:
E proite orgogliosa
Ti nd'istas zircundada 'e tant'ispina?
Deo so ispinosa,
Prite Natura cun manu divina
M'hat privilegiadu
Supr'a ogni fiore decantadu.

Appenas chi dignada
S'est de risposta a sa domanda mia,
L'happ'eo saludada
Meravigliadu a tanta cortesia.
Pura ma non toccada
La dassesi in su ratu chi la idia,
E vicinu l'odoro,
Distante l'happ'in mente e l'happ'in coro.

Dae cuddu mamentu
Chi custos ojos mios l'hana ida,
In su coro ausentu
M'hat fattu custa rosa preferida.
Ma pro viver cuntentu
In custos annos de dubbia vida,
'Eo jomper cheria
A la ider brillare in manu mia.

Rosa, m'has fatt'incantu
Su prim'istante chi t'happo miradu!
Deo solu su antu
Ti dò, coment'has bene meritadu.
E si jompia a tantu
De mi poder jamare fortunadu,
Adorare ti diia
Pro cant'est vida tua e vida mia...

Tra gentiles fiores
In nd'unu vasu isplendidu 'e oro;
Cun tottu sos unores
Coltivad'in su tou altu decoro;
Cun sos bellos colores
Distinos sempre in mesu a sos insoro.
'Eo s'arpa sonende...
Cantigos de amore improvvisende.