NARA COMARE

Nara comare proite a faccia trista,
Ti mustras cando passo a fac'a tie,
Ca deo t'happo in coro notte e die,
Cun amore costante pro me ista.
Assumancu signales cun sa vista,
Mi dà s'est chi sinzera amas a mie,
Ca deo a tie già t'amo costante,
Notte e die sinzeru a d'ogni istante.

E comente sinzera t'happ'amare,
Ischende ch'has in coro ater'amore?
Mancu sos ojos non ti pot'alzare,
Ca pro me ses fingidu e traitore.
Bae a ue podes coglionare,
Ca no mi burlas mancari minore,
Traitore dai me allargu passa,
Sa idea maligna a parte lassa.

Lassa narrer sas limbas de sa zente,
No nde torres pius a iscultare,
Chi m'ingannet su Deus onnipotente,
Si sò deo in bidea 'e t'ingannare.
Ses chi m'amas ti amo frequente,
Pro cantu biu in terr'happ'a durare,
Non so pro t'ingannare cree a mie,
Pro isposa costante cherzo a tie.

Deo puru pro te nde so gustosa,
Si su cojiu est propostu dae Deu,
Ses chi tue mi cheres pro isposa,
Beni e naralu a mamma e babbu meu.
Pro si o pro no la dezidin sa cosa,
Ca su mundu lu ponet in afeu,
Si dae Deus su coju est permitidu,
T'azzetto in sa bon'ora pro maridu.

Custa notte bi fatto s'imbucada,
Pro chi cherzo adempire a su dovere,
Cun distintos saludos a s'intrada,
Su gustu mi lu leo a piaghere.
Narzende si fiza ostra no est cojiuada,
Deo fatto sa dimanda pro muzzere,
S'est ch'azis piaghere de la cojiuare,
In breve si o no cherzo a mi dare.

Sezzi a chistionare de assentu,
Non sias de asie isfuriadu,
Già connosco su tou fundamentu,
Cun babbu tou che frades pesadu.
Ello comente cust'azardu has tentu,
De d'esser tue e tottu presentadu,
Sa cosa l'has pensada che addottu,
Chi ti ses presentadu tue e tottu.

Deo matessi mi sò presentadu,
Pro contu chi sa zente connoschia,
De che mandare no mi so fidadu,
Ca su mundu est pienu 'e gelosia.
Pro si o no, mi so azzardadu,
Pro mi azzettare o pro tenner sa ghia,
Com'est in manos bostras si o no,
Pronta risposta bos prego però.

Torrache pro ti dare sa risposta,
Da inoghe a pagas dies, fizu meu,
Daghi si trattad'in familia nostra,
S'intentu l'hasa a tenner e recreu.
Tue e tottu matessi tich'accosta,
Ca como a mandare atere es feu,
Si cheret Deu daghi hasa a torrare,
Si o no, sa risposta t'happ'a dare.

In familia su babbu dat faeddu,
Preguntende a sa fiza cun muzzere,
Nende bonu mi paret su piseddu,
Si fiza ostra nde hat piaghere.
Già possedidi in parte un'uconeddu,
E faghet sas fainas a dovere,
Su piaghere meu est tottu igue,
Ma, fiza avverte chi ti cojiuas ses tue.

Ecco ch'a sa paraula so torradu,
Comente azis su contio dezididu,
Bene o male de me bos hana nadu,
O in malu s'isformu est resessidu?
Tantu già so inoghe abbasalladu,
In sa matessi patria naschidu,
Si bene resessidu bos est su contu,
Pro su si o pro no eccomi prontu.

Su contu m'est bessidu giustu e tale,
Coment'eo in bidea lu tenia,
De te nisciunu m'ind'hat postu male,
Connoschende sa tua progenia.
Ses de indula bona e naturale,
Pro cussu est chi ti do a fiza mia,
Pro parte nostra azettadu già sese,
Ma prestu isbriga tottu in custu mese.

Sa mama cun sa fiza ambos umpare,
Ambas duas cuntentas sun restadas.
Nende sa mama bene a la trattare,
Ca sas piseddas cheren'iscusadas.
A medas annos potedas durare,
Cun salude, ricchesas e bintradas,
Babbu e mama risponden tott'ind'una.
Paghe bos dia Deus e fortuna.