MARIPOSA NON SIAS AZZEGADA

Mariposa non sias azzegada,
Rifletti cudda bella afflissione,
Chi ti daio a viver sussegada,
E a evitare sas occasiones.
Bides chi sa candela est allumada,
E tue affaca affaca ti che pones,
Tene rifflessione ca t'importa,
Si no, in sa fiama, restas morta.

Morta bi restas in cussa fiama,
Già chi sas boghes mias has intesu,
No siant fizas chi penana mama;
Comente tue chi bi ses in mesu.
Già podes narrer conta a chie clama,
Sest culpa tua, su t'aer offesu,
E si che intras in mesu 'e su fogu,
Perdes divertimentu ispassu e giogu.

Su giogu perdes su divertimentu,
Colza! e ti brujas alas e persone,
Deo t'haia dadu avertimentu,
E bido chi m'has tanta afflissione,
Mancu che chi ti ponzad' un'apentu,
Ti brujas e ti parat'a carvone,
E ater'è sa rejone dende a mie,
E accomi istracu avertende a tie.

A tie est tottu cudd'avertimentu,
E a tie naro si mi pones mente,
cando has a bider custu fogu tentu,
Tinde des apartare prontamente.
Non tenes ater'intrattenimentu,
E si a ti ponner serente serente,
Dae non ponner mente a sas iscolas,
Perdes sas alas e pius non bolas.

Comente custu olu hasa dare,
Disdicciada si non bi cunsideras!
Calchi die l'hasa a disizare,
Si custas alas perdere deveras.
E a chie sa culpa has'a bettare,
Si non cambias ateras maneras?
Non sun pius lezeras cuddas alas,
Che cando t'alzaias e ti falas.

Comente l'has a dare custu olu,
Chena poder pesare in altu vela,
Non des'haer pius cuddu consolu,
De sas alas ch'aias pro bandela.
Mariposa de te ja nd'appo dolu,
Si ti ch'ido ruende in sa candela,
Nos ses pius lezera ne ti tambas
Già chi sas alas t'has brujadu ambas.

Proite, Mariposa illuinada,
Giras custa fiamas tantu ardente?
Timo chi non ti restes ingannada,
Coment'idu sind'hat propriamente.
Fisti avertida e bene cossizada
A bolare suave e diligente,
E si passas in mesu pro assoluta,
Non t'abbizas si non in terra ruta.

S'est chi rues in terra eàdi morta,
In te non b'hat pius'ite chilcare,
Non dende attenzione a su ch'importa,
Non has pius sas alas de olare.
Non naras ti appo nadu a fune isorta,
Cussu 'olu lu deves raffrenare,
Però si curres a bidea tua,
De sas alas non as pius sa fua.

Pro finis como a so lende paura,
Chi non poto pius agguantare,
Nisciunu a issa li nerzat iscura,
Pro chi est mezus lassarela andare.
Si li piagher cussa calentura,
Tn su mantessi fogu hat'a brujare.
Già chi sa postu sa idea a pala,
Eo puru la mando in hora mala.