A SA IDE

 

Mamma natura, prodiga, t'hat dadu
Quasi una virtude singulare:
E ogni Anacreonte inamoradu
Cret chi tue l'aggiuas a cantare.

Una leggenda a mie hat imparadu
Chi Noè, pro ti faghere abbundare,
Tres animales b'hat sacrificadu
Intr'e su fossu, prima e ti calare.

Prima b'hat iscannadu unu paone
Pro dare a su licore pompa vana,
E pro li dare forza unu leone.

Pro sa terza virtude pius istrana,
Su sambene porchinu in unione.
O ide, in tres virtudes soberana!

 

1937