ROSA IN SA MATTA FOZZIDA

 

Rosa in sa matta fozzida,
Chi mi faghes abbagliare,
E podes resuscitare,
S'omine dae mortu a bida.
Ca tenes tantu primore
Permitti chi no m'aparte,
Mai dae ti mirare.
Su finissimu pintore,
Già t'ha piantadu cun arte,
Bandela istesa in su mare,
Benin tottu a ti adorare.
Pro sas ondras chi han connottu,
A t'adornare enin tottu,
Ca ses sola in gentilesa.
Su finissimu pintore,
Già ti a pintada cun arte,
Bandela in su mare istesa.
De sos amantes prinzipessa,
Modu bellu tuttillante,
Prinzesa de sos amantes,
E de navigantes vela.
Su finissimu pintore,
Già ti a pintada cun arte,
Istesa in mare bandela.
Preziosa dulze mela,
Cantu mi agravas ajosa,
Dulze mela preziosa,
Assolutta e singulare.

E podes resuscitare,
S'omine dae moltu a bida.

Sole 'e rajos adornadu,
Miradu pro sa sienzia,
Incantu de chie ti adora.
A mie m'ada incantadu,
Sa tua currispondenzia,
Cumplida bella aurora.
Non sussego si sò fora,
Sol' a t'ider sempre prego,
Si sò fora non sussego.
Columba mia decchida,
A mie m'ada incantadu,
Sa tua currispondenzia.
Bella aurora cumprida,
E dae me favorida,
Cun giuramentu lu crè.
Favorida dae mè,
Sa tua brillante istella,
A mie m'ada incantadu.
Sa tua currispondenzia,
Cumplida aurora bella,
Ses giunone o ricca perla.
Fatta cun perfezione'
Ses ricca perla o giunone,
Ses perfetta pro ti amare.

E podes resuscitare,
S'omine dae moltu a bida.

Sole essidu in oriente,
Chi nd'attis d'ogni desoro,
E ses dae tottu intesa.
Cando ses pius ausente,
Cando t'istimo e t'adoro,
Rara infinita bellesa.
Ses giocunda in candidesa,
In te tottu si radunat,
In candidesa giucunda.
Preziosa Margherita,
Cando ses pius ausente,
Tando t'istimo e t'adoro.
Bellesa rara infinita,
In su coro ses inscritta,
A litteras fines de oro.
Iscritta ses in su coro,
Sa sienzia lu declarat,
Cando ses pius ausente.
Tando t'istimo e t'adoro,
Bellesa infinita rara,
Rajos ti ettat sa cara.
Adornada ses de majos,
Sa cara ti ettat rajos,
Nada pro nos incantare.

E podes resuscitare,
S'omine dae moltu a bida.

Ses ricca perla o Giunone,
Ma pro ti lu assigurare,
Chi ses meda grassiosa,
Sa tua perfessione,
Mi faghe maccu torrare.
Perfetta incarnada rosa,
Filumena grassiosa,
Cantende ardutta sirena,
Grassiosa filumena,
E de bellesa adornada.
Sas tuas perfessiones,
Mi faghet maccu torrare.
Perfetta rosa incarnada,
De fiores rodeada,
Incantu de sos amores.
Rodeada de fiores,
Pinnadellu perfinadu,
De chie ti dèt lograre.

E podes resuscitare,
S'omine dae moltu a bida.